亞媽與孻仔

執下平時日日都拎住個斜揹袋，發現在下老母響 2003 年寫俾在下o既一封家書。當時都仲未 grad。但係好記得，佢係響在下約 2007 年底，在下自己一個搬出來住果陣先俾呢封信在下。

信中內容當然唔撚會講。但係原來在下呢一個孻仔，響老母心目中，真係永遠都係一個細路。
即係話，點都好，佢都唔會放心果隻。OK，當然唔係話佢老人家有咩問題。

其實自己住左年幾，再睇返呢封信，真係 OK 感動。
佢老人家又真係記得在下當年o既一舉一動，而佢響封信裏面所寫佢當年內心o既掙扎，可能真係一個母親先會有。信裏面所講o既野孩兒當然好多都唔撚明，但係佢老人家o既担心在下又可以理解。不竟「知子莫若母」，如果在下咁唔好彩，有個好似在下童年時咁仆街o既仔，又真係好難唔担心……

不過，真係想同老母講o既係：即使孩兒不想長大，孩兒現在也長大了。當年離巢的小燕子，現在飛得比鷹更快更高更遠。

嗯…… 雖然係好想咁講，但係 OUCH!!!! 實在太肉麻……
點樣同老母講好呢……

賤骨頭

屌那星，一放假就出事…… 條腰痛撚到仆街。
返緊工果陣又唔見有事，放假先來痛……

由細到大都經常腰骨痛。
春天o既時候谷落雨果陣最甘…… 細個試過好地地痛到喊。
而家呢鑊都 ok 甘，痛到唔係好想郁。

中學俾老豆的左去照 X 光，發現條腰骨同個標本完全一樣：一條模範腰骨，靚到冇得彈。

但係搞乜春無啦啦又痛…… 仲要放假先來痛……
真係辛苦命，賤骨頭……

Death in Service

做到就死，好撚想放假。At least 可以抖下訓番個靚覺。但係無奈地聽日又要開始 on call……
如果 on call 果陣死撚左，而死因又判定係因為疲勞過度，咁勞保有冇得陪呢？

忽然間諗起，當年簽 contract 果陣，有個 HR representative 響度講解 D contract terms。
仲好記得當年佢講到 Death in Service 果陣笑笑口咁話：「好， Death in Service。拿，做 IT 好危險架。會死架。」
屌，原來佢講真……